繼發起「佔中」同「雷動」後，港大法律系副教授戴耀廷再次牽頭組成「公民聯合行動」，話要喺網上搞個「特首選舉民間全民投票」，佢哋尋日公布投票詳情，話本周五開始一連十日會投票，仲預計有100萬人咁話。其實，「PopVote」先前已經因嚴重侵犯投票者私隱，被私隱專員公署發信警告而搞到一獲泡，今次再度強推，戴耀廷就聲稱投票只會透過通訊程式Telegram收集市民電話和身份證號碼，又話已應私隱專員公署要求，於系統收集市民個人資料一星期內銷毀喎。
另外，戴耀廷又矢口否認投票方式係為候選人曾俊華度身訂造，聲稱係一早構思好，仲話而家大約有20個「民主300+」選委會跟着結果投票；但係被問到如果林鄭月娥喺民間投票勝出，佢就轉曬口風，話平台只係供「民主300+」參考。唔單止咁，佢仲好積極呼籲市民「科水」，話成個計劃要150萬，而家先籌得大約四分之一款項，叫市民踴躍捐輸。講咩要守護香港前途，講到尾咪又係為「錢途」。
