圖：吳克儉笑住講「頭髮都白了，應該要退休」
今屆政府餘下四個月任期，教育局局長吳克儉昨日喺電台節目話完成呢屆任期後要唞下，笑住講「頭髮都白了，應該要退休」，仲話要多做運動同關懷屋企人，又諗住每個月抽啲時間讀30本書。至於會否出任其他公職，佢就話集中精神同所有注意力做完自己手頭上的工作。局方今日將宣布新嘅幼稚園教育課程指引，佢覺得有值得討論嘅新理念。
新出爐財政預算案喺教育嘅經常開支預算達786億元，佔政府經常性開支約兩成一。吳克儉承認開支比例為回歸後新低，佢話學生人口佔整體兩成，依家投放資源比例適當，又解釋政府要平衡不同範疇嘅需要，如因應人口老化要喺醫療加強投放資源。不過，吳局長又補充話，今年施政報告同財政預算案，喺教育投放唔少資源，如為今年開始實施嘅免費幼稚園教育，額外撥出27億經常性開支。
至於TSA爭議，佢直言外界要以事實為基礎，評論基本能力評估BCA，強調評估不記名，又非個人評估，罔顧事實批評BCA會造成學生壓力，係不負責任，對學校唔公道。
