圖：文化中心綵燈展名為「桃花池畔鳳求凰」
新春熱鬧餘興未消，下周六又來元宵佳節。今年「中國情人節」正值周末，天文台預測當日幾好陽光，氣溫介乎15至19度，啱曬情侶結伴到戶外同陽光玩遊戲。
如果大家當日尚未定活動，不如逛一逛康文署舉辦嘅丁酉年元宵綵燈會，行行市集、猜猜燈謎。今年綵燈會有三個，想要中西合璧嘅浪漫氣氛啱去文化中心露天廣場；想要傳統濃情蜜意可以去荃灣沙咀道遊樂場；想要歡樂熱鬧不如行下北區公園。
鄭晴都提一提男士們，當晚氣溫只得15度，逛綵燈會前不妨多帶一件外套，當涼風吹來，就可以為愛人披上外套，實行以紳士風度俘虜愛人芳心。
未有愛侶嘅朋友亦唔使愁，不如同一班老友去綵燈會看看掌相、睇睇馬戲表演，可能當你驀然回首，那人卻在，燈火闌珊處。
