圖：有食環署職員、警員到場了解「突襲」情況，游蕙禎惡形惡相刁難 大公報調查組攝
現代豪放女游蕙禎前日被《大公報》踢爆現身荃灣年宵檔攤後，尋日佢又再次大鬧維園年宵，去返原本投得嘅199號攤位。尋晚大約八點三左右，五、六名青年新政義工首先去到攤位霸位，大約九點左右，游蕙禎就施施然嚟到，喺已經圍封嘅攤位，掛上年宵產品，例如環保袋、Tee等等。佢又拎咗個大聲公，繼續散播「港獨」言論。
惡形惡相刁難警員
其間，約十名食環署職員同警員到場了解情況，警員就話，游蕙禎同幾名義工無預先申請，要求佢哋離開，但游蕙禎就不斷玩嘢，惡形惡相咁款話「年宵一定有人聚集㗎啦！你係咪玩我啊？」「我無所謂啊，你舉到條法例我咪走囉！」啲態度差到呢！食環署職員同游蕙禎理論咗七分鐘左右，之後職員同警員就先行離開啦！游蕙禎就繼續擺街站，大約晚上十一點十五分左右就離開。
鄭晴見到游蕙禎咁樣，真係嬲到眼火爆！警員好聲好氣咁勸佢離開，但佢就擺出一款咁嘅態度。話咗取消攤位，佢哋又選擇以「突襲」方式入嚟維園擺檔，成何體統？播「獨」又唔敢認，面皮真係厚過恐龍皮，影衰曬香港青年。
