大公網1月24日訊（記者 龔學鳴）：舊年大年初一旺角暴亂嘅衝突場面，相信對唔少市民嚟講依然歷歷在目。有份參與旺角暴亂而被控煽動暴動罪嘅「本土民主前線」發言人黃台仰，早前接受傳媒專訪嘅時候就聲稱，由於有唔少成員有控罪在身，所以今年冇計劃再發起保護小販行動，仲話希望修補同「泛民」嘅關係喎。
自從青年新政梁頌恆同游蕙禎被「DQ」之後，本土派嘅力量已經大不如前。連黃台仰接受專訪嘅時候都承認，昔日「年少氣盛」、「樹敵太多」，搞到需要人幫手嘅時候唔夠朋友，仲話希望本土派同「非建制派」日後可以少啲互相指罵喎。佢仲話，太倚賴網絡動員、群眾動員基礎薄弱、宣傳手法太着重排外，呢啲都係本土派嘅弱點。
黃台仰想向反對派示好，不過民主黨尹兆堅就唔多領情喇。佢話，本民前昔日對民主黨有太多武斷同「人格謀殺」嘅批評，而民主黨亦唔認同「港獨」，覺得雙方難以合作。
其實，本土派同「泛民」一向都唔咬弦，旺角暴亂發生之後，本土派就講明「泛民」唔係「同路人」，如今本土派淪為過街老鼠，就話想修補關係，聲稱要謀求合作空間，試問「泛民」又點會睬你丫。
