張建宗（中）同李慧琼（左）及郭榮鏗會面

　　大公網1月17日訊（記者 龔學鳴）按照慣例，政務司司長會定期同立法會內務委員會嘅正、副主席見面，就政府建議項目嘅議程安排同議員關注嘅事項交換意見，新官上任嘅政務司司長張 建宗亦唔例外。佢今日就同內會主席李慧琼（Starry）及副主席郭榮鏗會面。Starry事後仲響Facebook上載咗三人嘅合照添。

　　Starry響帖文話，自己作為立法會內會主席，同政務司司長定期開會係恆常工作。佢話，今日嘅會議時間比平時較長，因為大家都知道，響施政報告 公布後，張司長將會非常忙碌，所以佢同郭榮鏗都爭取時間多作溝通，為日後合作建立基礎。佢又認為，有好嘅溝通係一個好開始，希望日後行政立法關係能夠更加 暢順。

　　Starry仲響帖文打咗三個hashtag（主題標籤）：「#新官上任三把火？」、「#張司長當然唔會發火」，同埋「#只有服務市民既一團火」，大讚張建宗。

　　另外，最近愈嚟愈多立法會議員利用Facebook直播同網民交流。Starry亦都搞咗個名為「慧星直播」Facebook直播節目。今日係第一集，Starry就簡介咗內務委員會嘅職能同埋會議廳前廳嘅功能。唔知下次會講啲咩話題呢？