Caspar攞住生魚湯笑到有牙無眼。大公報記者龔學鳴攝
大公網12月21日訊（記者龔學鳴）辛苦一年到年尾，又逢冬至、聖誕假期，周圍都係一片喜悅氣氛，政府團隊亦唔例外。民政事務局局長政治助理徐英偉（Caspar）係Facebook曬相，當中包括政務司司長林鄭月娥同佢哋一班政治助理嘅合影，大家笑容都十分燦爛。
Caspar話，林鄭司長每年呢個時候都會係佢辦公室，邀請司、局長同各部門嘅署長、常任秘書長、政治助理等一班政府同事一齊慶祝聖誕，其間唔講工作，只係輕鬆交流，當作司長對同事們過去一年通力合作嘅感謝。
而對Caspar嚟講，呢個聚會最大亮點之一就係一味「生魚陳腎西洋菜湯」，係每年都會有嘅一道獨家招牌菜，其他地方飲唔到。Caspar一早就食指大動，難怪佢攞住碗湯，笑到有牙無眼啦。
