自由黨主席張宇人（Tommy）近日獲行政長官梁振英委任為行政會議成員，好多黨友都表示支持，唯獨一向與特首唔咬弦嘅榮譽主席田北俊（田少）就持相反意見，接受傳媒訪問嗰陣不時向Tommy潑冷水。田少尋日出席電台節目嗰陣，仲話Tommy最近突然積極參與黨務，又好似預計到做主席就有得入行會喎。
Tommy尋日就強調，政府邀請佢加入行會，係喺佢當選自由黨主席之後先至發生，又重申自己加入自由黨廿幾年嚟，做過好多黨務，又負責黨內選舉統籌工作，仲話自己喺新界東開地區辦事處仲早過田少添，所以絕對唔係所謂「忽然熱心」。
其實，田少喺2002年至2003年擔任行會成員期間，都係身兼自由黨主席，當時佢都唔覺得自己有咩角色衝突。唔知係咪因為佢依家主張「ABC」，所以先至對Tommy入行會睇唔過眼呢？
