自由黨主席張宇人/麥潤田/攝
大公網11月30日訊 自由黨主席張宇人（Tommy）近日獲行政長官梁振英委任為行政會議成員，好多黨友都表示支持，唯獨一向特首唔咬弦嘅自由黨榮譽主席田北俊（田少）就持相反意見，接受傳媒訪問果陣不時向Tommy潑冷水。田少今日出席電台節目嗰陣，仲話Tommy早前突然積極參選黨主席，好係預計到做主席就有得入行會喎。
Tommy回應事件嗰陣就強調，政府邀請佢加入行會，係響佢當選自由黨主席之後先至發生，又重申自己加入自由黨廿幾年嚟，做過好多黨務，又負責黨內選舉統籌工作，仲話自己響新界東開地區辦事處仲早過田少添，所以絕對唔係所謂「忽然熱心」。
其實，田少響2002年至2003年擔任行會成員期間，都係身兼自由黨主席，當時佢都唔覺得自己有咩角色衝突。唔知係咪因為佢依家主張「ABC」（Anyone but CY），所以先至對Tommy入行會睇唔過眼呢？
