大公網11月22日訊（記者 龔學鳴）下個月就係聖誕節喇，相信有唔少市民已經請定假、計劃好行程，準備響下個月底外遊，感受異國節日氣氛，但係你哋有冇留意自己嘅護照到期未呢？入境處就呼籲有意響聖誕及新年假期期間外遊嘅香港居民，應盡早申請旅行證件。
現時一共有157個國家及地區給予香港特區護照持有人免簽證入境或落地簽證安排，但係某啲地方就規定旅客須持有有效期不少於六個月嘅護照先至可以入境，包括台灣、新加坡、泰國等，呢啲都係港人嘅熱門旅遊地點。
入境處話，處理特區護照申請，響收妥所需文件、費用同埋相片後，一般需時10個工作日（不包括星期六、星期日同公眾假期），如果要處理郵遞、投遞或網上遞交嘅申請，可能需要額外兩至三個工作日。入境處又強調，只會響理由充分嘅情況下，先至會接納緊急簽發特區護照嘅要求，同埋通常都唔會為方便觀光旅遊而緊急簽發特區護照。市民記得提前辦理手續喇。
