圖:霍樂生(左)今日起接替區展秋(右)出任警察公共關係科總警司/大公報記者陳卓康攝
警隊公關換上新人事新作風,警察公共關係科(PPRB)總警司呢個負責警隊形象嘅掌舵人,今日起由元朗警區指揮官霍樂生接任,與現任總警司區展秋對調。霍Sir於1988年加入警隊,有16年時間都喺刑事情報科工作,亦做過毒品調查科、聯絡事務科等,曾經借調到保安局禁毒處,近年就擔任屯門及元朗指揮官,前年「佔中」佢長期駐守總部指揮中心,負責協調各工作小組嘅膳食、交通封路、人手等。
做慣情報人員,以後對住鄭晴▉會唔/會晤▉會封口乜都唔講呢?霍Sir就話面對傳媒對佢來講係新挑戰,佢應承一眾傳媒行家,以後可以講得嘅案件資料都會盡量講,而且近日候任議員被取消資格嘅風波、明年特首選舉以及回歸二十周年,都可能會再有社會動盪,會密切留意事態發展,亦會同現場指揮官好好溝通安排,方便大家做嘢。
海陸空「瓣瓣掂」
外表官仔骨骨嘅霍Sir,原來係一名熱愛運動,興趣係風帆、潛水及馬拉松,2004年至去年都有參加渣馬,四個半鐘內跑曬全馬,佢仲持有香港飛行總會小型飛機執照,放假都會飛返兩轉,真正海陸空「瓣瓣掂」。至於調去元朗嘅區Sir原來本身就係住元朗,佢話以後可以行路返工,不知幾方便。
另外,警隊繼YouTube及Facebook專頁後,尋日開設埋官方Instagram,希望吸引多啲年輕人了解警隊,裏面嘅相片都係經過精挑細選,主力sell軟性溫情,展現唔同崗位警察充滿活力和善嘅另一面,而facebook專頁就會主力提供實用資訊,大家有like開警隊fb嘅,都不妨follow嚇。
鄭晴