大公網11月15日訊（記者龔學鳴）青年新政梁頌恆和游蕙禎嘅宣誓案件，有人大釋法一錘定音，幾乎全社會都知道呢單官司梁游必敗無疑。但「佔中」禍首戴耀廷仲好似啱啱由火星翻嚟咁，尋日朝早接受電台訪問個陣，竟然「預測」政府會敗訴，原因係以往有案例，法庭不受理立法機關嘅內部決定，又話釋法內容未必直接對法院有規範性咁話喔。
嘩，「戴教授」你呃細路咩！連鄭晴唔喺好熟法律都知道，人大釋法對香港法院有約束力，過去幾次釋法都已經有充分說明，身為法律專家嘅「戴教授」係真唔識定扮唔識啊？只不過，連非法「佔中」、操盤選舉都可以包裝到冠冕堂皇，發出法院可以唔使理人大釋法嘅謬論，亦都好符合佢嘅一貫作風。但係事實勝於雄辯，無論「戴教授」講到幾似層層都好，最終法院下午頒布判詞，咪將佢塊面打到啪啪聲囉。
