《大公報》早前獨家踢爆游蕙禎在釋法日鬼祟去台灣，返港後又匆忙去銀行處理神秘文件，之後就步上停喺銀行門口嘅一輛黑色平治房車，該平治司機就係「香港人優先」召集人張漢賢。不過呢，身為游蕙禎嘅「親密戰友」嘅梁頌恆，尋日就喺facebook劃清界線，話「張秀賢我就識……張漢賢係乜水？咁都有得造新聞。」佢仲鄭重澄清：「本人與張漢賢先生並不相識，更無任何來往，特此澄清。」
明明影到司機係張漢賢，都話造新聞，鄭晴覺得梁頌恆真係唔好咁幼稚喇！同埋本報係話張漢賢去接載游蕙禎，又唔係話佢車埋梁頌恆，你係同張生劃清界線，定係想同游小姐釋法日去台灣之後返嚟又去銀行嘅事劃清界線呢？麻煩都再澄清下喇。
至於游蕙禎，鄭晴嘅同事有致電你問回應，你一路都唔回覆，尋日就喺facebook質疑我哋報道嘅公信力。唔該你聽下市民喺「反港獨 撐釋法」集會上嘅聲音喇，你同梁頌恆而家先係「過街老鼠」，一啲公信力都無。
