圖：鄭晴發現梁頌恆九點幾獨自到場全程玩手機\大公報攝

　　當外界關注「獨鴛鴦」仲會搞乜名堂嘅時候，尋日梁游就銷聲匿跡，完全無現身立法會。不過呢，鄭晴發現原來尋日朝早立法會開會嘅時候，梁頌恆就一枝公去咗灣仔伊利沙伯體育館競投攤位，密謀喺維園年宵「擺檔播『獨』」。但梁游早已係過街老鼠，唔少在場人士都對佢投以異樣目光，仲不時指指點點。

　　對於市民嘅非議，梁頌恆就扮睇唔到，全程低頭望手機，仲喺公眾場合翹起隻腳咁坐，態度好囂咁囉。尋日成個競投過程梁頌恆都好鬼祟，一路喺度遙控兩位跟班分開幫佢舉牌競投。佢離開會場嗰時都「閃閃縮縮」，同跟班前後腳離開。後來梁自己喺Facebook話，有「狗仔隊」從伊館一路追佢到灣仔港鐵站喎。鄭晴就發現，原來之前有段「正義師奶」痛斥梁頌恆嘅短片喺網上好受歡迎，有網友於是發起「全民追拍」「港獨」分子活動，睇嚟市民係積極響應囉！

　　附近檔主：唔好搞到做唔到生意

　　鄭晴後來仲八到，梁頌恆尋日以6.61萬成功投得維園年宵199號攤位及200號攤位，其中轉角位攤位費更高達4.55萬，揼本程度直逼公民黨嘅7.15萬。嘩，無得做議員之後梁游要回水接近200萬喎，仲有錢去維園擺檔？唔通真係有「金主」？有成功投得「青政」附近攤位嘅檔主同鄭晴講，到辦手續時先知道隔籬係「青政」，好無奈咁話。不過都有喺附近嘅檔主話，希望到時候唔好咁亂，搞到大家做唔到生意。係囉，今年大年初一旺角暴亂大家都仲係好驚驚，「港獨」千祈唔好又喺明年新年去衝擊維園啦！