大公網10月11日訊(記者龔學鳴)藉着在立法會選舉前炒作特首梁振英嘅「行李門」事件，始能躋身議事堂嘅公民黨飛機師新丁譚文豪，早前曾高調前往泰國，向國際民航組織(ICAO)亞太區總部遞交聯署信，但就大食「閉門羹」，到而家都未獲回覆。佢嬲爆爆咁預告會爭取機會出席聯合國會議，告ICA○一狀咁話。
事源今年6月，譚文豪帶同一批港人聯署，飛到泰國向ICAO亞太區總部遞交請願信，要求跟進梁振英女兒嘅「行李門」事件。但可惜「熱臉貼上冷屁股」，對方拒絕派人接信，令佢咁遠嚟到連面都見唔到，認真無面啊。唔知喺唔喺惱羞成怒，譚竟不顧行車安全夾硬「攔途截劫」遞信，要做「撞車黨」才能向一ICAO不知名職員遞信，最終面懵回港，真係陰公豬。
其實有咁嘅結果並不難預計，因為機場管理局早已公布調查報告，確認事件在處理過程並無違反機場保安規定，亦無違反國際航空安全標準。譚文豪為咗選票夾硬「抽水」，人哋又點會得閒陪你做「大龍鳳」啊。
