新一屆立法會會期下月中先開始，好多候任議員都趁空檔去遊埠充電，迎接未來四年嘅挑戰。民建聯三位議員就分別去咗唔同地方，等鄭晴帶大家「跟住民記去旅行」。咪……咪住，乜民建聯新界西立法會議員陳恒鑌（Ben）去旅行咩？點解張風景相變咗工廠相，究竟係咩新玩法啊？

　　李慧琼係廿四孝媽媽

　　人哋去歐洲日本嘆世界，阿Ben就去工廠當旅行，仲喺facebook講：「這種旅行才是最適合我的，問你怕未！」工程師出身嘅阿Ben同鄭晴講，其實嗰個係深圳一個朋友嘅工廠。早排諗住放假周圍探下朋友敘舊，因為之前去過佢哋工廠畀意見，今次就順便去幾個工廠參觀，連佢自己都覺得「去旅行變咗好似去咗做嘢咁，好搞笑。」

　　除咗阿Ben，民建聯主席李慧琼（Starry）同副主席周浩鼎（Holden）都趁有時間放咗個短假。Starry中秋就同囡囡去長隆動物園玩咗兩日，佢話因為囡囡鍾意小動物，又開咗學去唔到咁遠，所以揀去長隆，最緊要都係囡囡開心，真係「廿四孝媽媽」。

　　Holden就同老婆去咗幾日充滿陽光與海灘嘅沖繩。據鄭晴所知，沖繩潛水運動好受歡迎，不過，Holden話佢對潛水麻麻，仲笑住講：「所以日後開會都絕對唔會『玩潛水』㗎。」

　　3000蚊遊俄 300人爭30額

　　睇完係咪好想「跟埋民記去旅行」呢？咪話鄭晴唔益大家，佢哋趁12月搞咗個八日「『一帶一路』俄羅斯交流之旅」，團費只需3000蚊！不過，咁震撼嘅優惠當然有班「葡萄友」質疑資金來源啦。Starry就親自解畫，民記係依足程序向政府申請「『一帶一路』交流活動資助計劃」，仲歡迎非牟利機構或團體利用政府補助，搞「一帶一路」交流團帶學生可以多啲走出去。係囉，30個名額已經吸引300青年報名，可見青年其實都好渴望走出去，有啲人與其用小人之心猜度，不如諗下如何協助青年發展啦！