大公產品

首頁 > 文章 > 正文

王國興搵麥兜抗拉布 錯用麥嘜公仔

時間:2016-07-13 18:33:33來源:大公網



立法會議員王國興(大公報記者麥潤田/攝
 
  大公網7月13日訊(記者鄭晴)立法會今日舉行本屆會期最後一次大會,但面對反對派「拉布」,立法會能否喺星期五會期完結前,處理曬剩低嘅三項法案,包括醫生註冊修訂條例草案、消防修訂條例草案,同埋私營骨灰安置所條例草案,依然係未知之數。一向怒斥「拉布」歪風嘅工聯會王國興,尋日就帶咗自己嘅招牌道具「金鉸剪」,同埋一隻麥嘜畢業公仔返嚟立法會抗「拉布」。不過興哥就「老貓燒鬚」,認錯咗麥嘜做麥兜,事後仲喺Facebook say sorry添。 
 
  興哥今朝開大會之前同傳媒講,今屆立法會快將完結,就好似學生畢業咁,但立法會議員要真正畢業,就需要通過曬三條法案先得。佢仲即場讀咗四次「剪布秘笈」—「得正正喺度,坐定定喺度,乜都▉唔駛/唔使▉做」,話如果各黨派議員都關顧民生,就應該做到「剪布秘笈」所講,留守議會。 
 
  興哥不停以「麥兜」、「麥兜」咁稱呼手上呢位「豬隊友」,事後仲喺Facebook上載咗自己同「豬隊友」同埋「金鉸剪」嘅合照。不過,細細個睇《春天花花幼稚園》長大嘅鄭晴就發現,其實興哥手上嗰隻公仔,係麥兜個同學—麥嘜嚟架,麥兜嘅右眼係有深色胎記嘅。而興哥亦都好快發現自己認錯「隊友」,亦都急急發帖致歉:「麥嘜豬我認錯左你係麥兜?,仲要你陪我坐定定喺度,應該要認真道歉:真係唔好意思!」 

最新要聞

最新要聞

最受歡迎