世界杯開鑼，主辦國俄羅斯先拔頭籌，來個「開門紅」，在開幕禮首戰中以五比○擊敗同組沙特阿拉伯，在座捧場的總統普京也笑逐顏開，夠曬面子。

　　本屆世杯，對本港球迷來說是好消息，因為俄羅斯位處歐亞時區中間，一般開賽時間為本港傍晚六時、八時、十時，最晚一場也不過凌晨兩點，大可「世界杯送飯」，一路食晚飯一路睇波，唔使捱眼瞓。開波頭幾日更適逢周末、周日及端午節假期，唔通「屈大夫」都係球迷，有興趣睇波？

　　本屆世杯，三十二支勁旅，睇好邊隊？「正路」答案，應不離德國、法國、巴西、阿根廷四隊，前兩支歐洲隊、後兩支南美隊，正好代表了球壇兩大「門派」體系，前者重整體配合，後者講個人腳法，可說各擅勝場。不過，近年世界一體化，連足球也未能「幸免」，所謂歐洲踢法與拉丁踢法的分野已逐漸模糊，不再那麼壁壘分明，近年大批南美球員在歐洲搵食，歐洲頂班球會如西班牙巴塞及巴黎聖日耳門，前鋒射手都來自南美。

　　而四隊「大熱」中，德國隊整體實力仍然最值得看好，前中後三線平均，打法務實，紀律性強，但久休復出的門將紐亞可能有點隱憂；二十年前捧起「大力神」杯的「高盧雄雞」法國隊，陣中新人輩出，中前場的普巴與麥巴比將會是取分鑰匙；巴西隊無疑要睇尼馬，如此子發揮出色，可以「以一敵眾」，入球與傳送能力無人能及；阿根廷隊也是要睇一個美斯，美斯與「對頭」C朗一樣，今屆世杯可能已是最後一屆，必然要爭取多入球。

　　港人睇波，要畀錢收費台，八百多元睇六十四場不算貴，但免費台也有十多場直播提供，還有各大商場及酒吧可以睇波，好幸福呀。港人睇波，大多同時落注，還是那句老話：小賭怡情，而且幫襯馬會穩陣些。