圖：海之戀邀得C AllStar為樓盤拍廣告，以其青春活力打動年輕族群。海之戀「揸盤人」郭子威（右三）及封海倫（右四）

　　【大公報訊】記者梁穎賢報道：新盤蜂擁而出，發展商促銷樓盤不得不絞盡腦汁玩噱頭。向來賣樓計仔多多的長實地產（01113），旗下荃灣海之戀未賣已紅透半邊天，單是樓盤命名已一炮而紅，網絡媒體瘋狂洗版講足幾日，成為花生友熱講話題，唔使一分一毫已大收宣傳之效，完全符合經濟效益。

　　正所謂宣傳嘅嘢無人嫌多，長實今次再落多兩錢肉緊，更不惜大灑數千萬元，請來組合C AllStar合作，為樓盤遠赴海外取景拍攝廣告，同時睇中其全新派台情歌《一刻戀上》的動人歌詞，作為樓盤廣告主題曲。昨日記者會便邀得C AllStar現場演繹該曲，長實地產投資董事郭子威與營業經理封海倫，登時歌癮大發，衝上台與C AllStar四子jam歌，郭子威化身歌神，唱時更七情上面有曬台風，台下過百經紀亦交足戲，又嗌又尖叫又拍手，氹到「威哥」好開心。

　　作為樓盤主角的C AllStar四子亦好識做，輪流為樓盤廣告度橋獻計，更大賣口乖希望大家一刻戀上該盤海景、商舖、單位及會所，順便為自己首歌宣傳。

　　做完歌神又返回現實變番「揸盤人」，郭子威表示，海之戀第一期預售樓花同意書料可於短期內獲批，爭取月內至下月出擊。此外，旗下三盤上周宣布加價後，全線錄得成交，可見市場具承接力。