圖：老鼠拉龜││冇埞埋手

　　「埋」有「葬」的意思。對「葬」，我們可以有以下兩個講法：

　　把屍首埋「入」黃土中

　　把屍首埋進黃土「內」

　　那廣東人所用的「埋」字也有以下兩個意思：

　　入、內

　　據此，廣東人創造了不少相關的粵語方言用詞：

　　「埋位」、「埋席」指「入」座、「入」席。

　　例1：全人類都已經「埋位」，等你咋！

　　例2：夠鐘「埋席」，打完呢鋪（牌）好嚹！

　　「埋位」也指回到自己的崗位上。

　　例3：放心，我哋呢班兄弟夾慣夾熟，一「埋位」就可以「砌」（工作）！

 「埋尾」指某些工作已進「入」最後階段。

　　例4：呢單嘢講咗一個禮拜煞科（完事），你哋呢兩日先至話「埋尾」，個客唔「詐型」（表示極度不滿）至奇！

　　「埋便」指「內」面；正寫「埋面／埋邊」，「面／邊」音變讀「便」。

　　例5：呢啲咁秘密嘅嘢，響「埋便」傾好啲喎！

　　舊時的「大檔」（非法賭檔），除開設在一些較隱蔽的樓宇內，也會開設在橫街後巷中，入口以長布帳遮掩。為了招攬過路賭客，檔主會指派一名「接待員」在通道附近打點一下，順帶「睇水」（把風）；此人口中常帶着「發財埋便」這話兒，意指欲發財請進內。

　　「埋手」指「入」手。

　　有個歇後語「老鼠拉龜──冇埞埋手」，情況是：稍為一點風吹草動，或遇上襲擊，龜會把頭尾手腳一併縮進龜殼裏。老鼠如想拉龜，會是「無從入手」，難以成事。「埞」讀「deng6」，本字是「地」，地方的意思。

　　例6：呢份工，我返頭嗰幾個禮拜，真係好似老鼠拉龜咁，無埞「埋手」！

　　「迫埋嚟」指迫「入」來。

　　例7：個車廂中間已經企滿人，你再「迫埋嚟」都冇用！

　　「預埋你」指把你預算在「內」，即預你一份兒。

　　例8：一世人兩兄弟，有好嘢梗「預埋你」！

　　「行開行埋」指行出行「入」，即進進出出、出出入入；意味着不是長時期逗留在某個地點，有時會往別處去。

　　例9：呢間茶記個老細成日「行開行埋」，啲夥記咪有好多機會「吞pop」囉！（「吞pop」，正寫「吞泡」，「泡」讀「撲3-1」，寓意偷懶）

　　【「粵語方言用字：埋」之九】

　　香港資深出版人　　梁振輝