圖：「去『賣』鹹鴨蛋」原來是「去『埋』鹹鴨蛋」

　　本着「埋」有「藏」的意思，「收埋」就相當於「收藏」了。同理，「匿埋」就相當於「匿藏」。「匿」讀「lei1/利6-1或nei1」；再變聲母成「眯/mei1/味6-1」，但只限於「匿埋」。

　　示例1：

　　媽咪：婷婷，你後面「收埋」啲乜嘢呀？攞隻手仔出嚟畀媽咪睇過！

　　婷婷：冇偷雪糕食呀，不過正話食雪糕嗰陣整污糟咗隻手仔咋！

　　示例2：

　　「少年警訊」經常提醒市民，歹徒通常「匿埋」喺啲陰暗地方嗰度等機會落手。由「收埋」延伸的「收埋收埋」、「收收埋埋」，指老是把事情藏在心裏或行事秘秘密密的。

　　示例3：

　　有心理專家話，有嘢千祈唔好「收埋收埋／收收埋埋」，要攞出嚟同人傾下，唔係就好容易有抑鬱症。近排咁多人自殺，都係同呢樣嘢有關。

　　示例4：

　　輝仔：婷婷，聽講你拍緊拖喎！

　　婷婷：咪亂噏，畀阿媽知就話我唔專心讀書㗎嚹！

　　輝仔：唔使「收埋收埋／收收埋埋」，我唔會爆你大鑊嘅！

　　心中長期鬱悶不展，廣東人會叫「鬱埋／鬱埋鬱埋／鬱鬱埋埋」，這亦是導致抑鬱症的主因。

　　兒時有個「玩匿埋」的遊戲叫「捉迷藏」。「伊人」指那個人，泛指那些遊戲參與者，所以有人會叫這種遊戲做「捉伊人」，口語讀「捉衣因」。由於「捉迷藏」涉及「埋『伏』」和「『匿』藏」，所以有人也會叫這種遊戲做「伏匿匿」，口語讀「buk6 lei1 lei1/僕利6-1利6-1」。

　　話說回來，「匿」有一個口語讀音——「naat3/捺6-3」，只用於「匿埋」和「匿屋匿窟」。所謂「匿屋匿窟」，就是指足不出戶；當中的「窟」，讀「忽」，指古時人居的洞穴。

　　示例5：

　　「宅男」嘅一大特色係「匿屋匿窟」，沉迷喺網絡嘅虛擬世界度。

　　舊時，鹹蛋的製法是把鴨蛋埋在混有鹽的黃土裏三數星期。將「埋」字諧音化成「賣」，且死人就是埋在黃土裏，坊間就有了以「賣鹹鴨蛋」作為「死亡」的既詼諧又隱晦的講法。

　　示例6：

　　以為陳伯同老婆返咗鄉下，點知琴日老李同我講佢前日瞓瞓下覺「去咗賣鹹鴨蛋」，咁都算係「好死」（死得安詳）囉！

　　【「粵語方言用字：埋」之三】

　　香港資深出版人 梁振輝