譚鳴唔係「爛賭」，但久唔久都會同家人和朋友買嚇六合彩。不過疫情之下，六合彩大大話話都停辦咗成五個幾月。馬會剛剛公布會恢復攪珠，下一期在7月21日開彩。包括譚鳴在內，大家又可以同啲親友夾嚇買幾注六合彩，碰運氣發個橫財夢。

　　譚鳴睇咗馬會嘅新聞稿，佢哋話，留意到新冠疫情緩和，而且之前都已經有限度咁重開投注站，審視過重開之後嘅運作，決定由7月21日起恢復舉行六合彩攪珠，並會喺7月16日起開始售票。至於賭波客，馬會亦會喺16日開始，恢復喺投注站同電話投注，受理足球投注服務。馬會透露，停辦期間，已排程嘅66期攪珠取消；對比去年同期，少咗約33億元的投注額。計一計，譚鳴推算政府就咁都少咗約9億元稅收。

　　當然，大家仍然要注意衞生，馬會都會要求入投注站嘅人，接受體溫檢查，亦要求大家戴外科口罩入內；同時提供酒精搓手液，特別請大家留意攞飛後填飛要用公家筆。不過，見到咁多人申請政府的一萬元，都係上網登記，其實大家都要改嚇習慣，多啲用電子服務，包括投注都係，又方便又可減少社交接觸。

　　翻查紀錄，對上一次六合彩攪珠已經係在2月1日，仲要係「新春金多寶」，不過因為頭獎有人中，所以復開一期，只有800萬元的頭獎基金下限。講起上來800萬元都唔少錢，我譚鳴搵咗近年同7月21日開彩的攪珠結果，畀人家參考下。