【大公報訊】記者朱俊賢報道：中美貿易戰舉世關注，美方的經濟欺凌行為引起香港市民不滿。慈雲山一間跌打醫館早前於店外掛上橫額加收看診的美國人25%「關稅」，表達對國家的支持，有市民為他打氣，網民點讚，也有不同聲音。不過，醫館近日也收到過百個匿名電話滋擾，恐嚇電話甚至遠自德國。醫館負責人香國成表明「未驚過」，但亦慨嘆，只想表達個人感受，卻被一群人有組織性地恐嚇，要他噤聲。

　　不滿美國挑起貿易戰

　　慈雲山老字號「香國成跌打醫館」早前於店外掛起橫額：「即日起，凡美國國籍遊客在本醫館就診須加收25%關稅，煩請知曉！若有不便，請諮詢美國大使館！」一時成為網上熱話，網民褒貶不一，甚至有傳媒嘲笑橫額有錯別字，質疑美國人會光顧醫館的機會很少。醫館負責人香國成跌打師傅理直氣壯表明，「掛橫額」是立場表態，他不滿挑起貿易戰的美國政府太霸氣，「倡議自由貿易嘅係你（美國），話大家唔收咁多關稅嘅又係你，而家你唔夠人做就加我哋關稅，咪即係輸打贏要！」

　　香國成坦言未考慮過行動會有社會回響，惟橫額一掛，卻有意外收穫，「掛咗兩日已經有朋友話畀我聽，佢哋有啲喺美加朋友話嗰邊（媒體）已經睇到我呢個banner，起碼可以畀美國或者其他國家知道，香港人都係企喺國家嗰邊嘅。」香師傅說起來一臉自豪。

　　不過「加收美國人25%關稅」的橫額亦令香師父醫館受到嚴重滋擾，一個星期以來收到逾百個匿名電話打來醫館，有的語帶恐嚇，當中不少內容更是缺德至極，「一打嚟就用粗口問候我家人，又鬧我哋係共產黨走狗，甚至咒嚟睇病嘅病人跛手跛腳，醫館快啲執笠，我助手一日收幾十個電話，總之呢頭擺低電話又響，再擺低又響，不斷滋擾我，我要侷住晾起間舖個電話。」

　　正所謂打開門做生意，總不能長期把電話拿起，香國成指醫館有客人不值滋事分子所為，幫忙在電話設定拒接功能，滋擾來電得以減少；但是，他的手提電話隨之遭殃，「打唔到入醫館就打我手提，有啲甚至顯示係外國打嚟。」香國成表示通常都不會接聽這些外國來電，只是有時都會「抵唔住頸」：「我咪行去無人嘅地方剷佢囉，反正我唔鬧佢，佢就鬧我阿媽，雖然我阿媽過咗身但都唔想佢哋鬧。」

　　稱不拆橫額便「有你好睇」

　　有來電者出言恐嚇，威脅稱若不把橫額拆掉便「有你好睇」，香國成表明「未驚過」：「我驚？香國成朝早九點鐘就返嚟呢度，日日恭候。」碰巧記者於採訪當日早上，醫館就來了不速之客「踩場」，「個怪人入到店舖就問我，話我掛條橫額，好鍾意愛國愛黨呀？我答佢係呀！跟住佢就走咗去嘞！」他一臉坦然地告訴記者。

　　香國成慨嘆，整天說香港有言論自由，他的個人立場表態卻惹來無理打壓，要他噤聲：「邊有人咁得閒日日咁樣打電話㗎？我覺得直情係有組織，專係對付啲肯出聲撐國家嘅人。」雖然掛上這橫額的確帶來不少滋擾及不便，但樂觀的香師父笑言有「意外收穫」，「掛咗條banner生意反而好咗呀，因為有傳媒廣傳，有啲客話以前嚟睇過睇症，本來都忘記咗我，而家因為呢單嘢喺電視睇到我，就記得之前嚟睇過，所以返返嚟搵我睇喎，搞到我好似賣咗個廣告咁！」

　　仁心仗義 擇善固執

　　香國成徒弟何先生形容師父一向為人仗義，見到經濟拮据的街訪長者來看病，會減收診金，一些小治療甚至不收分毫。他憶述數年前有名來自兒童之家、大約十多歲的青年因傷來醫館看病，沒有錢付診金，香國成照樣替該名青年治療，還着他日後才補付診金。令何先生想不到的是，大家都忘記此事下，該名青年卻一直銘記在心，幾年後因找到工作，有點積蓄，特意回來醫館補付當年的診金，「估唔到，幾感動。」

　　何先生認為，掛橫額一事聽到各有褒貶的意見，坦言師父性格「我行我素」，會「堅持做對的事」。何又指對師父的醫術有信心，也不擔心事件會影響醫館生意。

　　投資有道 有樓有舖

　　香國成理財投資亦有一手，他憶述自己九十年代開始投資房地產，九七前曾幾個月內累賺千萬。九七金融風暴下一度欠債三千萬，要減持手頭物業才免於破產。2001年他再以400萬買入現居於牛池灣的逾1200呎複式單位，估計現市值逾1100萬。香國成目前仍持有三個九七年前投資的住宅單位，市值已「翻身」，再加上近年他於醫館附近一帶買入了數個舖位投資，估計這名跌打師傅身家相當不菲。