香港國安法實施後，畏罪潛逃嘅「手足」特別多，唔少都着草唔成。其中，12人蛇早前就喺內地海域俾廣東海警截獲，現正俾深圳市公安局鹽田分局依法刑事拘留。有台灣記者則於早前踢爆，有五名着草台灣嘅「手足」俾台灣當局扣留成兩個月都音信全無。不過，雖然都係「手足」，台灣嗰五個就無人問津，12人蛇就日日俾攬炒派拎嚟做騷，真係同人唔同命。
岑敖暉鄒家成煽寄卡送暖
偷渡人蛇畀人當場截獲，唔少有心嘅「手足」都好擔心。岑敖暉同鄒家成日前就發起所謂「十二手足中秋送暖行動」，號召班「黃絲」寄「中秋卡」畀12人蛇送暖喎，仲話要四圍搞「街站」。攬炒派九龍城區議員李軒朗、油尖旺區議員朱江瑋等都話要搞埋一份，連前「香港眾志」秘書長黃之鋒(河童)都和應咁話：「即使『手足』收不到信件……寄信到看守所仍然有用。」
不過，網民「Gary Chan」就醒起應該漏咗五個喺台灣音信全無嘅「手足」：「唔係17個咩，哦，台灣捉×左(咗)去就唔理，唔當人係手足。」「Edwin San Sin」就押埋韻：「十二手足難忘記，五個手足由佢死!」
唔少網民亦覺得攬炒派根本就冇心關注嗰五個「人間蒸發」咗嘅「手足」。「Peter Wong」就話：「5個做咗condom(用完即棄)啦!」「Sam Sham」就笑言：「好彩去咗大陸，否則去咗台灣，連比(俾)人拉咗都唔知了。」
容樂其譏想「害死手足」
有網民都覺得就算寄「中秋卡」畀12人蛇唔止冇用，反而仲會適得其反。《輔仁媒體》總編輯容樂其就喺其Facebook專頁發帖，講笑話：「要幾想嗰12個人死，先會發起叫人寄信俾(畀)佢地(哋)。」仲「hastag」(標註)「已經變左(咗)馬騮戲」。「Peter Yip」則揶揄：「寄信記得寫埋回郵地址咁就可以連自己都搞埋。」
「Ka-Yu Boss Chu」就好「中肯」咁講：「佢地(哋)只係想做D(啲)野(嘢)令自己感覺良好。佢地(哋)只係諗自己，無諗過幫12人，亦無想佢地(哋)死，係諗都無諗過。」
「Jimmy Wong」就解釋返點解攬炒派成日掛住做騷：「騙徒慣用手法，仲話寄卡比(畀)12門徒，見到無得見，寄卡點會收到呀!停一停，諗一諗，搞咁多花臣，目的又騙捐獻或眾籌錢，到時又帶錢逃之夭夭，過往曾出現好多個喇!」
