圖：張建宗指，新政府上任短短百日，各司局長已經親身落區探訪近50次，展現務實新風，零距離接觸市民，聆聽意見

　　中國傳統習俗入面，BB出世一百日會行「百日禮」。唔講唔知，原來尋日亦都係新一屆政府就任第一百日，政務司司長張建宗就以「務實有為顯新風 零距離接觸市民」為題，寫咗網誌紀念呢個咁特別嘅日子，仲話呢短短百日內，各司局長已經親身落區探訪近50次，司長話佢哋非常重視民意同尊重區議會的角色共謀發展，每次都逗留到唔願走，絕對唔係「HI-BYE式」嘅「關公」做「騷」伎倆。

　　張建宗講到，今屆管治問責團隊希望為香港帶來新氣象，最具體及由零開始到落實的措施，莫過於通過每年增加36億元的教育經常撥款。又提到特首已經委任多位副局長及政治助理，團隊已接近「齊腳」階段，依家團隊有個目標，希望各司局長上任頭兩年都可以行曬全港18區，唔係齋行，係與市民同行，聽市民盡訴心聲，反思及改進不足之處。

　　唔好以為有蜜月期，司長話上任呢百日一啲都唔風平浪靜，好似八、九月期間，香港雖面對兩次強颱風吹襲，但各部門嘅同事就展現咗佢哋嘅應變和專業能力，以及基建防禦措施發揮效力，令香港安然渡過。他又充滿信心咁話，未來五年香港會面對不少挑戰，但深信只要同心協力、同舟共濟，必定能衝破障礙，推動香港向前邁進。