自由黨原山頂區區議員陳浩濂獲任財經事務及庫務局副局長，民建聯原東華區議員蕭嘉怡就成為政務司司長政助，因此山頂和東華兩區下月26號要補選。選舉事務處尋日宣布，補選今日開始接受提名，直至本月16日截止。
山頂區方面，鄭晴就聽聞自由黨準備派出教育局前政助楊哲安出戰，而本身係山頂居民嘅新民黨主席葉劉淑儀早前亦都表明話有意競逐呢個位。至於東華區，多個反對派都虎視眈眈，不願意內部協調之餘亦出現內訌，民主黨更畀人踢爆，話即使揀個知名度低嘅人出選，亦要死「霸住個區」。據知，民主黨考慮派出兩屆區選都落敗嘅社區主任伍凱欣戰東華，而中西區街坊保育及規劃聯盟羅雅寧，同埋啱啱喪失立法會議席嘅姚松炎，亦話想加入戰團。究竟最後邊個去報名，反對派要拉隊撐邊個，真係不得而知。至於早前考慮參選嘅新思維，就因無人報名而不參與。
