唔少學生都夢想做律師。香港律師會自2010年起，每年都會舉辦「青Teen講場」，為中四至中六學生提供平台探討時事之餘，亦可以思考嚇與法律相關嘅民生議題，總共有80間學校報名參加。因應近年有唔少法庭案件都引起社會熱烈討論，律師會就將今屆「青Teen講場」嘅主題定為「法．理．情」，希望令學生能夠以多角度看待法庭案件。
「青Teen講場」最吸引同學仔嘅活動，相信係11月4號同18號舉行嘅模擬法庭比賽喇。司法機構今年就向律師會借出五個高等法院法庭舉辦比賽，等參與學生可以過嚇「律師癮」。不過，比賽之前當然要做足準備先啦，「青Teen講場」會響10月14號舉辦講座，邀請律政司司長袁國強同律師會會長擔任主講嘉賓，介紹香港司法制度，以及訴訟過程同技巧。
