圖：「深水埗明哥」獲嶺大頒授榮譽院士，以表揚佢卓越成就，圖為他早前向記者展示中聯辦主任張曉明寫贈的橫幅
「深水埗明哥」陳灼明，多年嚟義贈飯盒畀深水埗貧困露宿者，善舉早已街知巷聞。善心無限嘅佢，繼上月底獲中聯辦主任張曉明肯定，贈予親筆寫「為善最樂」橫幅後，尋日獲嶺南大學宣布另一威水事，就係今年十月將獲頒授榮譽院士，以表揚佢卓越成就，同埋造福社會嘅重要貢獻，實在可喜可賀。
等鄭晴同讀者回一回帶喇，其實明哥身為餐廳東主兼廚師，早於2008年同香港社區組織協會合作，以超抵價售賣飯票畀深水埗區內嘅草根階層。時至今日，義贈活動喺義工隊協助下，愈搞愈好。家下每個禮拜，總共派四次飯，每次派近400個飯盒畀露宿者及長者，甚至乎難民。
明哥舊年仲成立咗社企「北河同行」，自行組織義贈食物活動。喺眾多嘅贊助下，與慈善組織「平等分享行動」合作，喺佢嘅餐廳派發飯盒。明哥憑住慷慨仁慈嘅精神，甚至更被街坊封為「深水埗善心撒瑪利亞人」。
明哥助人行善不求回報，德行早已被全港市民公認。試問呢次攞獎，捨佢其誰呢。大家亦應該借鏡借鏡，日行一善，以善養德嘛！
