「叫人仔女去『佔中』，自己仔女好輕鬆。」呢句係鄭晴前日喺區域法院門外，聽到叫得最大聲嘅口號，但係當事人「佔中三丑」就詐聾扮聽唔到。
勢估唔到，三丑之首戴耀廷竟然毫無悔意，不知羞恥，仲洋洋得意喺FB撰文，話喺犯人欄入面，「大家能見到銘（黃浩銘），都很興奮，忘記了自己身在法庭內。」又自爆希望坐監後嘅差事，係「做廚房的工作」，「陳健民就希望做木工，陳淑莊就問是否可以做縫紉。大家說着，根本不像快要入監的一群人，而是好像一群大孩子興高采烈地討論希望在夏令營做什麼？」仲話入監房對佢哋嚟講，「不是一種屈辱，反有一份光榮。」
唔係嘛，虧佢堂堂一個法律學者，上到庭咁都得？不過，正所謂「有咁耐風流，有咁耐折墮。」戴丑都就嚟飯碗不保，勢畀港大革職，到時佢仲會唔會咁口響？
戴丑亂講嘢亂寫嘢，一向至叻！睇返喺舊年立法會選舉時，佢搞個乜嘢「雷動計劃」低智配票機制，結果累到自己友李卓人出局，早前被DQ嘅「長毛」梁國雄當時都話「多得戴耀廷搞咁鬼多嘢！」之但佢仲未識死，近排仲想照辦煮碗，喺澳門立法會選舉再搞「雷動」，最後，梗係無人睬佢啦！
鄭晴諗，派呢款「學者」去做廚房？因住引火自焚呀！
