大公網8月23日訊 政府昨日公布政務司司長張建宗明天會上廣州，為駐粵經濟貿易辦事處主辦香港回歸20周年成就展開幕，仲會考察南沙嘅發展規劃。張建宗離港期間，就由「星星局長」、環境局局長黃錦星署任政務司司長，因為佢係問責局長中資歷最深嘅一位，今次仲係佢首次「升呢」做「星星司長」添。不過，張建宗即日就返香港喇，換言之「星星局長」署任司長只有大半日，大家都知張建宗出名勤力，做問責局長時九年都唔放假，下次「星星局長」要過鋪「司長癮」都唔知幾時喇。
「三耳局長」、政制及內地事務局局長聶德權今次都會陪張建宗上廣州，政制及內地事務局副局長陳帥夫會署任局長一職。另外，民政事務局局長劉江華明天至下周二訪問日本京都及內地天津，出席中日韓文化部長會議，預料新任民政事務局副局長陳積志會首次署任局長職務。
