圖：Ann姐嘅新髮型唔使五分鐘就完成，Ann姐大讚師傅手勢好 大公報記者林良堅攝
尋日多個團體合作舉辦三千人義剪活動，為深水埗、油尖旺同九龍城區長者及兒童免費剪髮，勞工及福利局副局長徐英偉同民建聯立法會議員蔣麗芸（Ann）都有出席，兩個人仲即場進行「飛髮」活動，親自嘗試義剪隊嘅手勢添！
喺大師嘅真功夫之下，阿Ann嘅新髮型唔使五分鐘就完成，之後仲不停照鏡兼同人影相添，睇嚟佢對新look十分滿意喎！阿Ann同鄭晴講，自己咁大個女都係第一次喺千人面前剪頭髮，大讚師傅手勢好，仲話如果有多啲時間，希望剪得再清爽少少，配合炎炎夏日嘛！
徐英偉、深水埗區議員鄭泳舜（Vincent）就不約而同話，自己都經常喺屋企幫阿仔剪頭髮，非常之有經驗。不過Vincent話，而家囝囝大個仔，唔肯再畀爸爸剪，反而鍾意去髮型屋多啲喎！
