圖:賣家喺網上兜售三大卷印花
惠康超級市場推出儲印花換廚具,購物滿60蚊有印花一個,唔少人密密儲,尋日有神秘賣家喺網上兜售三大卷合共6000個印花,網民嘩嘩聲,事關照計要買18萬嘢先儲到,印花來歷惹起熱議。鄭晴追查下,呢位神秘賣家真身曝光啦!
鄭晴以買家身份聯絡神秘賣家,相約喺港鐵太子站交收,每個賣八毫子。神秘賣家自稱做批發業,趁周六日會有雙倍印花入貨,所以儲埋咁多。印花銷情極好,截至尋晚七點已經賣出一半,有人一口氣買500個。鄭晴觀察,短短半個鐘,已經有四個人嚟交收,神秘賣家之後去咗附近一幢唐樓。
有網民質疑印花來歷,惠康發言人回覆話,有既定員工守則及指引派發及處理印花,並設有監察機制,而印花於發出後屬顧客所有,難以訂明守則不可轉售。