大公網8月10日訊（記者 龔學鳴）球類活動種類繁多，唔知「門球」你又聽過未呢？民建聯深水埗區議員鄭泳舜（Vincent）尋日一早就到大坑東遊樂場，睇下一班「老友記」響草地門球場一展身手，事後仲上載片段到自己嘅Facebook專頁添。
「門球」其實係一項團體運動，每隊派出五人，每人用球槌擊打個波，依次通過「一門」、「二門」同「三門」，每過一道門就得一分；球最後撞到「中柱」就得兩分，分數最高嘅隊伍勝出。
片中所見，熱愛運動嘅Vincent一直都企響場外觀察，並聽取駐場教練介紹，未有落場同長者切磋球技。不過佢都對呢項運動好感興趣，仲大讚長者球技了得。佢亦呼籲各位長者多做運動，鍛煉身體，平時除咗耍太極同耍八段錦之外，都可以試下打門球。
鄭泳舜（左一）去大坑東遊樂場睇長者打門球
