圖：羅智光
羅致光、羅智光兩位局長尋日齊齊落區，到底邊個打邊個？其實只要認住，經常為公務員同事打氣嘅係公務員事務局局長羅智光；經常愛心爆棚嘅係勞工及福利局局長羅致光，就會好似鄭晴咁唔會搞錯喇！
羅智光（Joshua）尋日去屋宇署，先同署長張天祥等高層會面，然後同部門各職系員工傾偈。Joshua之後去負責深水埗、葵青和荃灣區私人樓宇安全嘅組別參觀，了解佢地點樣對付僭建物、危樓、破損排水系統呢啲危機。
至於愛心爆棚嘅羅致光（CK），就毋懼酷熱，遠赴元朗區家訪，向長者、有特別需要家庭送上大禮，分享香港回歸20周年喜悅。CK其後去天水圍天晴邨一間兒童發展中心，了解言語、職業與物理治療服務，而且成個「大細路」咁，同有特殊需要兒童一齊玩，又同受助家長會面了解需要。局長話：「政府已經預留咗4.6億元，『到校學前康復服務試驗計劃』完結後將服務常規化，仲會分階段將服務名額擴展至7000個。」希望幫到更多有需要兒童健康成長。
