圖：下周本港會出現月偏食，市民唔好走寶喇

　　香港人，唔好再做低頭族「頭耷耷」喇，抬起頭，兩個不可錯過嘅天文現象，下星期接連喺香港上空出現。長達五小時嘅月偏食，下周一立秋（7日）夜晚展開，浪漫嘅英仙座流星雨，下星期六（12日）連續三晚劃破黑夜長空，流星雨高峰期適逢周末假期，相信會成為唔少情侶嘅拍拖節目，想追星，記得早啲去搵靚位！

　　睇月偏食 面向南至西南方

　　今次兩個天文現象，太空館天象指數有三粒星最高評級。月偏食預計會喺下周一晚11點48分開始，直至周二清晨4點53分，食甚時抬頭望天，見到月亮無咗大約四分一。由於月食期間仰角頗高，天文台估計，大部分面向南至西南方、無遮無掩嘅地方都可以睇到。

　　當日雖然適逢立秋，預示炎夏將盡，秋天快臨，但天文台預測當日酷熱，氣溫高達33℃。如果唔想熱辣辣走出街，鄭晴提議你，可以睇天文台、太空館、可觀自然教育中心暨天文館、保良局顏寶鈴書院、香港聖公會太陽館．度假營嘅聯合網上直播，觀賞月偏食（www.hko.gov.hk/gts/event/webcast-20170807_uc.htm）。

　　賞流星雨首選港島南區

　　不過鄭晴更有興趣嘅係，每年八月必睇嘅英仙座流星雨，舊年撞正多雲有微雨，追星族只能雲罅觀星，今年天氣預報未揭盅，但太空館話，英仙座流星雨將下周六踏入高峰期，每小時多達150粒流星在香港上空掠過，粒粒光暗不一，十分有睇頭。

　　睇流星雨，首先要有「靚位」。天文學會前會長梁淦章話，今年英仙座流星雨會喺東至東南面掠過，最佳觀賞時間係星期日（13日）晚上11點，但一定要揀光害極少之地，首選係港島南區，例如大潭水塘、黃泥涌水塘公園。想浪漫啲？淺水灣泳灘、赤柱正灘都係唔錯嘅選擇㗎。