圖：葛珮帆（中）建議港鐵全線列車加「天眼」
港鐵每日平均乘客量超過460萬人次，人多擠迫下「色狼」容易有機可乘，單計今年頭三個月，已發生23宗港鐵非禮案，舊年亦有149宗，比前年123宗上升21.1%，各位姊妹們都咪話唔驚。民建聯家庭事務委員喺六月底至七月期間，用電話訪問898名12歲以上市民，當中有591名女生；發現原來有三成多嘅受訪女生曾經喺港鐵車廂畀色狼非禮，但入面有九成都無報警，主要原因係覺得難以舉證同怕尷尬咁話。
唔好以為女仔先會中招，有46名受訪男性都話，試過喺港鐵畀人非禮，65%男性仲話繁忙時間內在港鐵車廂內，好容易被人誤會非禮，令佢哋都好困擾。
民建聯立法會議員葛珮帆就相信，呢啲數據只是冰山一角。佢又話，女性喺地鐵被非禮非罕見，並建議港鐵喺繁忙時間預留車廂畀女士專用，同埋喺全線列車加裝閉路電視，保障女性安全。
