大公網訊 適逢香港回歸20周年，立法會由今日起舉行以「回顧與展望」為題嘅展覽，同市民分享立法會回歸20年以來嘅工作，展覽喺立法會綜合大樓地下大堂及圖書館展出，展期去到7月31日。
圖書館內有好多由各國議會、政府交流時送贈嘅紀念品，好似由最高法送贈嘅中國古代青銅器「朕匜」仿製品，立法會主席梁君彥話呢個係中國第一份最完整嘅判決書，別具意思。圖書館內亦擺放咗臨立會會議紀要同97年回歸當日三讀通過第一個法案會議過程正式紀錄嘅真品，可以話係立法會一直以嚟其中最重要嘅文件！
除咗以上展品，展覽亦準備咗唔少互動展品，好似介紹歷任議員嘅電子展版、亦有俾參觀者聽聲估下邊一位議員發言嘅遊戲。大堂上仲有一棵「花樹」藝術裝置，代表立法會聆聽市民意見。參觀者可以由15個品德中揀出1個最希望立法會做到嘅，掛喺「花樹」上面。梁君彥就話自己作為主席揀咗盡忠職守畀自己，至於揀咩畀各位議員，佢話：「如果議員做曬15樣，滿分就最好喇。」
