司局長透過寫網誌加強與市民溝通，成為新常態，鄭晴尋日發現，政府新班子兩位新局長羅致光、黃偉綸，都有延續前任局長寫網誌嘅習慣，返工第二日就開始在鍵盤「發功」寫網誌，真係勤力。勞工及福利局局長羅致光話，會保留勞福局網頁內嘅「局長網誌」，但預告自己會有唔同風格。至於由發展局常秘「升呢」做局長嘅黃偉綸，頭炮就力Sell觀塘翠屏河。

　　羅致光為網誌「剪綵」嘅第一篇文章，以「新的一頁」為題，形容出任局長是揭開新一頁，自己多年參與唔同政府委員會工作，有助第一時間投入新角色，期望同勞福局同事、勞工處、社會福利署一齊制定同推行適切嘅勞福政策措施。佢仲話，要同工商界、非政府機構、公民社會建立更密切嘅夥伴關係。羅局長又預告，未來嘅局長網誌「會有不同的風格」，喺合適時候分享佢嘅工作或觀點。咦，唔通佢未必逢星期日寫網誌？

　　黃偉綸嘅網誌「局長隨筆」，「剪綵」文章係介紹「活化翠屏河計劃」，介紹將觀塘工業區敬業街明渠打造成綠化河道。鄭晴記得，前兩任發展局局長都喺唔同場合，介紹過活化翠屏河計劃，一再向公眾推銷，睇嚟發展局確實好重視呢個項目。黃局長喺網誌話，渠務署剛完成第一階段公眾諮詢，亦已經諮詢區議會、海濱事務委員會，深深感受到公眾希望翠屏河能為社區添加更多活力嘅冀盼。鄭晴同普羅市民一樣，都想快啲見到計劃起動呀。