圖：林鄭透露唯一新定做嘅旗袍就係為咗宣誓呢個重要而值得紀念嘅日子。圖右為國家主席習近平

　　行政長官林鄭月娥履新後隨即開Facebook專頁，連續兩日出Post講述就職嘅「幕後花絮」。佢尋日上載影片，叫大家估下佢呢幾日着過幾多套旗袍？佢仲自爆近日着過嘅旗袍中，只有就職典禮上嘅淺粉紅旗袍同外褸係新定做，係本地著名時裝設計師嘅作品。

　　親「身」推廣本地設計

　　身為首任女性特首，林鄭嘅打扮成為唔少市民嘅關注焦點。佢尋日就以短片形式，回顧自己喺領導人視察香港三日期間嘅旗袍look，貼文寫着：「【東方女性】旗袍穿來莊重典雅，最啱應付隆重場合。大家估下國家領導人視察香港呢幾日我着過幾多套旗袍？」標籤咗「#旗袍 #本地設計 #東方女性 #着完再着」。

　　林太喺片段旁白透露，呢幾日所着嘅，大部分係舊衫，唯一為咗宣誓呢嗰重要而值得紀念嘅日子，新定做咗由本地著名設計師設計嘅淺粉紅色旗袍同外褸。佢話，身為首位女性行政長官，應該要展示「東方女士嘅特點」，仲可以藉此推廣香港本地設計。

　　佢話近年着多咗旗袍，而家有30幾件旗袍，其實都夠用，因為佢時常會配搭一件唔同嘅外套，帶出唔同嘅效果，而不斷「翻着」旗袍，係「環保生活行為」，希望將擁有嘅旗袍物盡其用。

　　林太嘅短片，十個鐘內已有2.3萬人睇過，近1400人畀「讚」同「心心」。好多網民留言讚佢着得端莊大方有氣質，而且發現淺色、粉色系列最啱佢，仲有人問佢到底搵咗邊個本地設計師幫佢設計旗袍。

　　鄭晴就數到，林太呢幾日至少着過八套旗袍，你又數唔數到呢？