圖：6500隻得意嘅小黃鴨到時會「游」入公園，同市民見面 海洋公園提供
七月慶回歸活動多籮籮，海洋公園一年一度嘅「夏水禮」又嚟喇！適逢今年係海洋公園40周年，園方決定大玩懷舊，以「懷念仲夏」為主題，活動由7月1日至8月27日。
為咗慶祝40周年，公園今年力邀名人同著名品牌合作，邀請世界著名雕刻大師Ray Villafane，將園內嘅「怡慶坊」變成充滿夏季色彩嘅沙灘，雕砌出全港最巨型沙雕，遊客有機會親手砌沙，體驗沙雕嘅趣味。另外仲會首次同本地品牌經典鴨LT Duck合作，6500隻得意嘅小黃鴨到時會「游」入公園，同市民見面。
而早前大受歡迎嘅夜場活動，載譽歸來，7月14日至8月27日（8月26日除外）有夏日夜場優惠，逢星期五、六、日延長公園開放時間，下晝五點後入場，可以用接近半價優惠去買夜場門票，成人收費288元，小童144元，如果喺7-11買飛仲分別平多40元同20元，實行比大家玩到盡！
海洋公園行政總裁李繩宗話，預計七至八月期間可以吸引180萬名遊客入場，又相信無論生於任何年代嘅香港人都會對今次活動感到非常親切。鄭晴非常贊同，而家都忍不住要去同小黃鴨自拍啦，大家千祈唔好錯過！
