唔少大頭蝦人士成日唔記得增值八達通，搞到張卡「嘟」兩「嘟」就負錢，揦手唔成勢！不過可以放心喇，皆因八達通卡有限公司宣布，今年10月1日起發行嘅新卡，一次備用餘額將由現時35元上調至50元，用落實更加方便。
注意喇，目前嘅租用版八達通用唔到新安排，想用嘅話就一定要10月時去換新卡。另外，八達通又推出「不常用八達通行政費」，張卡如果三年內無增值或作支付用途，將會每年被扣除15元。唔想蝕錢嘅，記得將唔用嘅退還，拎番啲按金好過。
