大公網6月10日訊 民建聯立法會議員黃定光(象哥)同張國鈞(Horace)嘅漁灣議員辦事處今日開幕，佢地提到兩星期後小西灣都會有另一個佢地嘅辦事處開幕。點解兩個開幕期咁近呢？Horace同鄭晴講，其實佢舊年年尾已經喺漁灣辦事處落咗名，但係由新年開始一直忙到而家先有時間搞開幕呀。
Horace話近來工作真係相當困身，每個星期三、四要開大會，星期五又有內會同財會，到星期六佢都要開完工務小組委員會先趕來開幕，其他唔使開會嘅時間亦有地區工作同好多活動要做主禮嘉賓，所以而家太太帶埋兩個女去迪士尼玩已經唔再預佢，三人直接自己出發。
出名鍾意健身嘅Horace而家一星期只係盡量抽時間做一次gym，加埋每星期四晚同朋友去踢波。佢話好彩成班波友都識咗好耐，都係圍內分開A、B隊踢，而且大家年紀、體力都差唔多，所以唔會踢得太辛苦，每次踢完大家就各自趕返屋企湊仔湊女。呢啲真正係忙裡偷閑呀。
