圖：施永青（左四）呼籲市民在家多種植盆栽
如果你係環保嘅一分子，一定知尋日（6月5日）除咗係年度「世界環境日」，仲係「香港綠色日」。由香港環保促進會發起嘅「香港綠色日」，今年踏入第五個年頭，今屆主題係「對抗氣候變化，改變自己開始」。唔知你又識幾多招「綠色妙計」呢？
響應環保低碳，其實唔難。鄭晴尋日喺「香港綠色日」啟動禮上都學到唔少新嘢。入門級嘅，當然係非必要下唔揸私家車，改搭公共交通工具，甚至步行或者踩單車取代；或者出街買嘢食時，自備保溫杯同食物盒，用少啲發泡膠盒。
想生活再綠色少少？不妨考慮下大商家施永青尋日分享咁，喺屋企可多種植盆栽都唔錯㗎！佢仲話，環保唔可以單靠「環保激進分子」，反而需要全民起動、商界支持才成事。鄭晴諗起一句名言可以套用下：「不要問環保可以為你做什麼，你應該要問自己可以為環保做什麼」。仲諗咁多？快啲改變自己日常生活習慣啦。
