前日係端午節，唔少立法會議員都有食糉應節，不過大家對食咩糉都好有研究，好似獨立嘅立法會議員何君堯就話，自己對鹹同甜嘅糉都鍾意食，不過佢最鍾意嘅鹹糉要夠清新，有蛋黃吊味已經夠，唔需要加肉！
民建聯立法會議員蔣麗芸（Ann姐）喜好嘅糉，就更有特色，佢會將紅豆糉先蒸至半熟，再切片沾蛋漿煎嚟食！Ann姐話，呢種煮法效果相當唔錯，大家想玩新意思，出年都可以跟Ann姐試下煎糉。
經民聯立法會議員林健鋒（Jeffery）就以量同類取勝，佢尋日早餐同午餐都係食糉，仲食咗廣東鹹肉糉、鹼水糉、唔同口味嘅上海糉同紹興大糉！不過Jeffery始終覺得，都係傳統簡單嘅鹹肉糉最合佢口味，因為係由細食到大嘅味道，而且佢都係鍾意傳統嘅人。
不過，鄭晴聽到林健鋒食咗咁多糉，都有啲為佢擔心，不過Jeffery話，唔係佢一個人食曬咁多隻糉，而且食完都有做運動燃燒熱量。
