大公網5月28日訊（記者龔學鳴）唔講唔知，多才多藝嘅民建聯主席李慧琼（Starry）仲做過龍舟比賽嘅司儀。佢今日作為嘉賓出席東區龍舟競渡大賽，就臨時被邀客串司儀，仲拉埋副主席張國鈞（Horace）一齊講解比賽。
雖然喺臨時起意，「重操舊業」嘅Starry攞起講稿介紹參賽隊伍依然頭頭是道，仲同Horace一唱一搭，雖然唔熟賽事，但都似模似樣。自言第一次嚟睇龍舟比賽嘅Horace感覺樣樣新鮮，不斷向兩位專業司儀請教大龍同中龍嘅區別、混合龍舟嘅男女比例等問題。
司儀就解釋話，一般嘅中龍有一名鼓手，一名舵手，同20名劃手，大龍嘅規模就大咗一倍有多，合共50人；而混合龍舟中嘅男子劃手不得超過12名，即係話女子劃手至少有8名。對龍舟唔喺好熟嘅朋友今次托Horace嘅福，一齊學到嘢啦。
李慧琼（左二）、張國鈞（左三）客串司儀
