圖：CY做義工教老友記同基層點用智能電話上網 網上圖片

　　「聞說佢時常在下午，來這裏作探訪～」行政長官梁振英（CY）尋日下晝出席咗由願景基金會同香港齊心基金會合辦嘅「十面埋『服』2017社會創新服務大賽」，同在場百幾名義工一對一咁教上百位老友記同基層家庭點樣用智能電話（Smartphone）上網。CY唔只教啲小朋友同老友記點用電話，仲同一班中學生大玩自拍，睇佢Selfie手勢如此純熟，仲經常去做義工服務社會，就知我哋特首係走在潮流嘅尖端啦！

　　話說呢個十面埋「服」社會創新服務大賽十分之有意義，大會較早前募捐咗啲二手手機送比老人家，等青年義工幫手教佢哋點用電話及上網功能，而好多義工都係IT人，仲用他們嘅才能或者專業知識，加上創新嘅意念，喺過去幾個月服務咗唔同嘅對象，受惠者有近12000人。

　　盼重建康樂設施早日落成

　　CY喺Facebook分享話知道有身為潛水教練嘅義工，幫助殘障人士體驗潛水，啟發他們「不可能也會變成可能」，不過佢哋喺教學過程中都遇到好大問題，因為香港泳池短缺，好難有場去教殘障人士潛水。CY話，知道好多地區都有設施不足問題，所以已經係今年施政報告拍板興建或重建41個地區體育及康樂設施，希望能夠早日落成，畀更多市民享用。

　　佢仲讚賞在場嘅義工唔單止拎時間同精力出嚟，仲自掏腰包去做服務，不只係「家在香港」，仲體現到「家是香港」嘅精神。CY仲話好高興見到香港義工服務發展蓬勃，就好似前日落區，去到港島東，見到老人家80幾歲仲做義工，同佢講愈幫他人，自己愈精神。「施比受更為有福」，鄭晴都好希望香港市民可以好似CY一樣多啲做下義工，令社會生活更加美好。