《商品說明條例》生效以來，鄭晴已經愈來愈少聽到掛羊頭賣狗肉嘅事件發生，但尋日法庭就有單新聞，葵興一間酒樓賣88蚊一客嘅「鮑魚福建炒飯」，被海關「放蛇」調查揭發，炒飯內竟然無鮑魚！酒樓承認控罪，被判罰款五千元，負責人話廚師貪方便用咗罐頭螺片，事發後已炒咗十個員工，包括廚師。

　　話說海關喺舊年八月收到投訴後，派員假扮顧客，去新葵興廣場的「茗苑宴會廳」買「鮑魚福建炒飯」，經政府化驗所檢測證實，炒飯內無鮑魚，但有螺肉，不符餐牌顯示的商品說明，於是檢控酒樓違反《商品說明條例》。

　　酒樓店長王國偉尋日喺西九龍裁判法院承認控罪，求情時話為咗慳皮，結果酒樓被判罰款五千元。據王國偉話，酒樓經營六年，老闆做生意好老實，係用真材實料，對螺肉充鮑魚事件，都係海關「放蛇」後至知。佢話錯就要認，自己要負好大責任，對事件好慚愧，廚師貪方便，用廿幾蚊一罐嘅海螺片代替鮑魚，公司已經炒咗廚師等十個人。

　　消委會：裁決可警惕飲食界

　　消委會總幹事黃鳳嫻話，食物貨不對辦投訴時有收到，希望今次裁決可警惕飲食界。有飲食業人士同鄭晴講，餐廳賣「鮑魚通粉」收嗰幾十蚊，無乜可能係真鮑，但自從《商品說明條例》生效後，菜單通常註明「仿鮑魚」，免觸法網。