圖：佳龍駒盆骨嚴重折裂，搶救不治\資料圖片
尋日係香港馬壇一個傷心日子，香港首匹四歲三冠王「佳龍駒」以大熱身份，出戰沙田馬場第七場1600米國際一級賽冠軍一哩賽，但賽事途中突被騎師莫雷剎停，未能完成賽事。「佳龍駒」送院後仲證實咗盆骨嚴重折裂，兼出現嚴重併發症，經馬會獸醫搶救無效，傷重不治。準「馬王」隕落，不少馬迷感到惋惜。
現年四歲嘅「佳龍駒」屬澳洲自購馬，為全國政協常委洪祖杭名下，來港兩年總共上陣十三次，贏過八場頭馬、一次亞軍，累積總獎金超過三千萬元。「佳龍駒」一生中最大成就，莫過於今年初連贏香港經典一哩賽、香港經典杯，同埋香港打吡大賽，成為本港首匹四歲三冠王。戰績驕人，自然多人鍾意。
就「佳龍駒」傷重不治，馬主、馬迷當然痛心。除咗馬會行政總裁應家柏向馬主洪祖杭送上最深切嘅慰問，亦有網民認為，今年七月時應向「佳龍駒」頒發「冠軍人馬獎」，實至名歸畀番佢一個「馬王」名分。願安息，「佳龍駒」。
