舊年喺Facebook「打雀論英雄」嘅民建聯四大元老─譚耀宗（譚sir）、曾鈺成、葉國謙（阿謙）、陳鑑林（橄欖），今年要將「麻雀枱」搬上舞台啦。民建聯副秘書長黎榮浩喺尋日傳媒茶敘嗰陣透露，「四老」將喺九月舉行個民建聯25周年會慶上，上演「愛國愛港二次方」舞台劇嚟針砭時弊，作為成個晚會嘅「重頭戲」，該劇更由拍攝喜劇著稱嘅知名導演高志森執導。
咁「四老」究竟會擦出點樣嘅火花？黎榮浩笑笑口話，四老人性格各有不同，由佢哋之前打麻雀就可見一斑：曾鈺成專食大牌；譚sir係出曬名嘅冷面笑匠，唔聲唔聲密密做牌；阿謙就四平八穩，永遠唔會出銃；橄欖性格火爆，食糊都食得爆啲啊。
鄭晴淨係聽到咁嘅組合描述，經已忍唔住笑出口，到時真係唔慌無驚喜啦。
