近年建制派同「泛民」喺立法會嘅關係劍拔弩張，建制派「班長」廖長江、民建聯主席李慧琼及自由黨黨魁鍾國斌等早前籌劃嘅跨黨派飯局，尋日敲定呢個周四中午舉行。據悉民建聯副主席陳克勤、經民聯副主席林健鋒、工聯會副會長黃國健、新民黨主席葉劉淑儀以及民主黨主席胡志偉、公民黨黨魁楊岳橋、專業議政召集人郭榮鏗等已答應出席，但不包括「本土派」議員。
唔少人都覺得今次係雙方緩和關係同建立恆常溝通機制嘅好機會，不過當事人就表現得十分審慎。廖長江強調飯局只是「一次性」，「唔係外面咁諗」。李慧琼話，市民期望立法會不同黨派「多啲對話，少啲對立」，盼飯局係一個好嘅開始。鍾國斌亦都話，會面唔會有前設同議題，如果合拍就可以恆常化，但如果大家感覺一般，就未必會有下一次啦。
